Старото училиште „Димитар Влахов” во село Љубојно ќе биде адаптирано во Центар за промоција на македонскиот јазик. Информацијата за изработка на проект за реконструкција и ревитализација на училиштето била разгледана денеска на редовната 119-та седница на Владата.
„Имајќи ги предвид вредностите на Старото училиште „Димитар Влахов” во селото Љубојно, надлежната установа НУ Завод за заштита на спомениците на културата и Музеј- Битола, како што соопштија од Министерството за култура, иницира постапка за негова реконструкција и ревитализација како Центар за промоција на македонскиот јазик,“ соопшти владината прес-служба.
Министерството за култура е задолжено да ги преземе сите натамошни активности за адаптација на училиштето „Димитар Влахов’’ во Љубојно во Центар за промоција на македонскиот јазик.
Фото: Википедија