Бугарија има значителни проблеми со човековите права, стои меѓудругото во годишниот извештај на Стејт департментот за состојбата со човековите права во земјата минатата година.
Во извештајот Стејт департментот ја критикува Бугарија за дискриминација на етничките Македонци кои живеат таму.
Се посочува дека бугарските власти продолжуваат да го спречуваат регистрирањето на здруженијата на етничките Македонци, како што се ОМО Илинден, Друштвото на угнетени Македонци, жртви на комунистички терор, Граѓанско здружение за заштита на фундаменталните индивидуални човекови права и Македонскиот клуб за етничка толеранција во Бугарија, и покрај 14-те претходни одлуки на Европскиот суд за човекови права во врска со нарушувањето на слободите на здруженијата.