Денеска во Кочани се одржа вториот протестен марш под мотото „Задоцнета реакција“, организиран од семејствата на настраданите во пожарот во т.н. дискотека „Пулс“.
Граѓаните преку транспаренти порачаа „Нашите ангели заслужуваат правда“, „Стоп за селективна правда“, „Ова не е несреќа, ова е убиство“ и слично.
Учесниците на маршот тргнаа од Паркот на Револуцијата во 12 часот и 5 минути, изразувајќи го незадоволството од задоцнетата реакција на надлежните институции, како една од причините за големата трагедија.
Колоната од неколку стотини граѓани помина во Трговскиот центар кратко задржувајќи се пред кафе барот чиј сопственик ја имаше и дискотеката, а оттаму се упатија пред зградата на Општина Кочани каде се наоѓаат и просториите на Државниот пазарен инспекторат.
Пред Полициската станица имаше едноминутен молк, а потоа пред Основниот суд и Основното јавно обвинителство побараа информации за досегашната истражна постапка.
Граѓаните повторно се вратија на почетното место во Паркот и најавија дека ваквите протести ќе продолжат сѐ додека не се откријат и казнат виновниците за трагичниот настан.
Фото: Фејсбук/Радио Кочани