Нов вознемирувачки предизвик на ТикТок. Млади корисници се предизвикуваат меѓусебно да земаат високи дози на парацетамол.
Предупредувања за новиот предизвик веќе има во Швајцарија и Белгија, каде здравствените власти го вклучија алармот.
Аптеките се повикани да бидат повнимателни при продажбата на овој лек, а населението е предупредено на ризиците, кои може да бидат и фатални.
Во Македонија предупредување стигна од доктор Нико Беќаровски, кој на Фејсбук предупреди дека овој тренд може да има фатални последици, дури и при медицинска интервенција.
„Труењата со парацетамол се меѓу најсмртоносните труења со лекови. Дури и мали дози од 10-15 таблети предизвикуваат оштетувања на црниот дроб, додека внесувањето на 20-40 таблети може да доведе до сериозни труења, а над 50 таблети често завршуваат фатално,“ пишува тој на Фејсбук и апелира до родителите да внимаваат на своите деца и да разговараат со нив за опасностите од ваквите предизвици.
Доколку се случи труење, важно е да се реагира веднаш.
Парацетамолот е еден од најчесто користените лекови против болки во светот. Активната состојка е содржана во бројни лекови како што се Парацетамол-Мефа, Дафалган, Панадол, Неоцитран, Алгифор и други.
Токсичноста на активната состојка може да доведе до тешка хепатална инсуфициенција доколку се користи неправилно и може да биде дури и фатална во случај на предозирање.
Првите знаци на труење може да се појават дури 24 до 48 часа по ингестијата. Знаците на труење вклучуваат абдоминална болка, гадење, проблеми со координацијата и жолта кожа.
ПОВРЗАНИ ВЕСТИ
На Токсикологија нема пациенти кои учествувале во ТикТок предизвикот со парацетамол
Парацетамолот не е безопасен: Може да го оштети црниот дроб и да предизвика зависност
Фото: Унсплеш