Новиот министер за здравство, Арбен Таравари мандатот го започна со увид во нефункционалноста на хируршките сали и со разрешување на економските директори на клиниките.
Тој информираше дека дал наредба за разрешување на економските директори на кои им завршува мандатот – 7 до 8 в.д. директори од вкупно 14, а веќе била дадена и наредба што побрзо во Собранието да се донесе измената на Законот за укинување на функцијата економски директор на клиниките.
„Денес се разрешуваат одреден број на економски директори на кои што им завршува мандатот. Тие што се со малку поголем мандат, ќе ни треба измени на законот. Сметајте дека за месец-два нема да има економски директори. Не сакам да не тужат тие што имаат мандат до август, септември, па да одиме по судови,“ изјави Таравари.
Министерство за здравство, утврдило низа слабости во јавните здравствени установи во кои биле именувани двајца директори, заради несоработка на лицата кои биле именувани за директори, при што се јавувале практични проблеми за реализација на акти и постапки каде што се барала согласност на двете лица.