Поранешната министерка за внатрешни работи, Гордана Јанкулоска денеска во Кривичниот суд Скопје беше ослободена од вина за случајот “Тврдина“, кој се однесува на уништување на опремата со која масовно се прислушуваа илјадници граѓани, а го отвори поранешното Специјално јавно обвинителство.
Бегалецот Горан Грујевски, поранешен началник на Петтата управа доби 14 години и шест месеци казна затвор за злоупотреба на службената положба и овластување и за фалсификување службена исправа.
Никола Бошковски, кој исто така е во бегство, а е поранешен вработен во поранешната Управата за безбедност и контраразузнавање (УБК), за истите дела доби затвор од 9 години и 10 месеци.
Тони Јакимовски, шеф на кабинетот на поранешниот директор на УБК, Сашо Мијалков, доби три години затвор.
Грујевски, Јакимовски и Бошковски треба да ја надоместат и направената штета во износ од 87.422.668 илјади денари во рок од три месеци.
Валентина Симоновска доби условна казна од две години затвор, која нема да се изврши доколку таа во рок од пет години не направи друго кривично дело.